Heyrðu nú - minn kæri Sýsli

 

Kona ein mér nákomin, býr við ofsóknir fyrrverandi eiginmanns síns. Hún og börnin hennar hafa mátt sæta stöðugum og linnulausum hótunum, ónæði og ofbeldi af hans hendi.

Fyrir skömmu var dæmt nálgunarbann á manninn, enda hafði hann ekki sinnt aðvörunum lögreglu, né neinu tiltali. Reyndar var það svo að í kjölfar slíkra ábendinga færðist hann allur í aukana. Loks keyrði um þverbak þegar hann misþyrmdi öðru barni sínu og konunnar, 7 ára stúlku.

Þrátt fyrir nálgunarbannið hefur ekki dregið úr áganginum. Fjöldi hringinga og sms sendinga á dag með allskyns skilaboðum, hótanir og heimsóknir er það sem fjölskyldan má stöðugt búa við. Hvert einasta brot á nálgunarbanninu hefur verið kært til lögreglu. Það hefur ekki áhrif.

Það er barnaverndarmál og dómsmál í gangi vegna  ofbeldis hans gagnvart börnunum.

Nú hefur konan fengi bréf frá Sýslumanninum vegna þess að karlinn hefur krafist umgengnisréttar við börnin. Henni ber að mæta til Sýslumanns á morgun og skrifa undir samkomulag um að umgengnisréttur hans verði virtur.

Í barnaverndarlögum segir m.a:
“Hverjum þeim sem hefur ástæðu til að ætla að barn búi við óviðunandi uppeldisaðstæður, verði fyrir     áreitni eða ofbeldi eða stofni heilsu sinni og þroska í alvarlega hættu er skylt að tilkynna það         barnaverndarnefnd.

Annars er hverjum manni rétt að gera barnaverndarnefnd viðvart um hvert það tilvik sem telja má að hún eigi að láta sig varða.”

Svona tilkynning er ígildi kæru. Spurning hvort mér beri ekki, samkvæmt þessu, að kæra Sýslumanninn í Hafnarfirði til barnaverndarnefndar.

…eða sennilega er það engin spurning.
 

Athugasemdir

[Gísli Hjálmar , 31.1.2008 kl. 21:44]

Að sjálfsögðu ekki. 

Það er siðferðileg skylda okkar að gera það.

[Álfhóll, 1.2.2008 kl. 13:31]

Skýr Hörður, skýr!  Það verður fróðlegt að fylgjast með meðferð kærunnar. Leyfðu okkur að fylgjast  með.

Bestu kv. Guðrún

[Halldóra Halldórsdóttir, 2.2.2008 kl. 03:27]

Ég skil ekki - hvað með rétt barna til að búa við öryggi?

[Hörður Svavarsson, 2.2.2008 kl. 15:23]

Guðrún: tilkynningar til barnaverndaar eru afgreiddar og skoðaðar án þess að tilynnandi sé upplýstur sérstaklega um niðurstöðu máls. Það eru sjálfsögð persónuverndarsjónarmið og hagsmunir viðkomandi barns höfð í heiðri. Sá sem tilkynnir mun því ekki geta flutt neinar fréttir.

Halldóra: Í lögum virðast vera ágætar girðingar. Í barnalögum segir t.d.

"Ef sérstök atvik valda því að mati sýslumanns að umgengni barns við foreldri sé andstæð hag og þörfum þess getur hann kveðið svo á að umgengnisréttar njóti ekki við"

Einhver misbrestur virðist vera á framkvmdinni því mér berst póstur frá fólki sem virðist eiga í sama vanda og ég lýsti í þessari bloggfærslu. Það þarf því að blogga meira. 

[Guðmundur Rúnar (IP-tala skráð) 2.2.2008 kl. 19:11]

Já, minn kæri Hörður. Blogga meira og tilkynna - því það er ekki bara siðferðileg skylda, heldur einnegin lagaleg!

[Björn Heimir (IP-tala skráð) 4.2.2008 kl. 18:33]

Það sem gildir í svona málum er að vera meiri frekja og ruddi en sýslumaðurinn. Þeir sem fara út fyrir normið og gefa sýslumanninum puttan, þeir virðast því miður komast upp með hvað sem er. Þetta gildir bæði um konur og karla.